Фото: Julien Tromeur
Покрај познатите фактори на ризик како што се прекумерното консумирање алкохол и прекумерната употреба на лекови, постојат и други фактори кои можат негативно да влијаат на здравјето на црниот дроб.
За да го заштитите здравјето на црниот дроб, не ги игнорирајте овие штетни навики, пишува „Ординација.хр“
Премногу газирани пијалоци
д-р. Ентони Пуополо наведува дека прекумерното консумирање алкохол може да предизвика заболувања на црниот дроб, но тоа не е единствениот пијалок што е исклучително деструктивен за црниот дроб, туку и газираните пијалоци.
Истражувањата покажаа дека луѓето кои пијат премногу од овие пијалоци имаат многу поголем ризик од заболувања на црниот дроб, а исто така постои и ризик од воспаление, фиброза, па дури и цироза. Ако пиете премногу од овие пијалоци, време е да престанете и да ги замените со вода.
Земате премногу суплементи
Триста Бест, нутриционист, наведува дека непотребните суплементи дефинитивно имаат негативно влијание врз здравјето на црниот дроб.
„Ве советувам да ги земате само оние витамини и суплементи препорачани од вашиот лекар. Некои од природните препарати можат негативно да се одразат на црниот дроб и бубрезите, па може да дојде до запек, а токму тоа е причината зошто претходно треба да разговарате со вашиот лекар. Додатоците се раствораат во телото како храна, а вишокот се филтрира преку црниот дроб и бубрезите и на крајот се излачува преку урината. Големите количини на непотребни суплементи му прават стрес на црниот дроб“, рече таа.
Лоша исхрана
Кингсли потсетува дека лекарите со причина ја нагласуваат потребата од здравите навики и балансираната исхрана, црниот дроб не може да поднесе сè што му дaвате. Премногу лоша храна значи премногу работа на црниот дроб. Ако не може да ги разложи сите масти, тој ќе ги складира.
Ова јасно може да доведе до воспалителни процеси и оштетување на клетките на црниот дроб. Накратко, лошата исхрана и нездравите навики во исхраната го ставаат црниот дроб во состојба на постојана работа сè до моментот кога веќе нема да може да ја извршува неговата работа и ќе настане оштетување на органот.
Недостаток на спиење
Кингсли вели: „За жал, повеќето луѓе не разбираат како недостатокот на сон може негативно да влијае на здравјето на телото. Покрај сите можни неволји, недостатокот на сон особено ќе го оштети црниот дроб поради оксидативниот стрес кој може да ја попречи способноста на телото да ги преработува мастите, а резултатот може да биде зголемување на телесната тежина, развој на дијабетес и срцеви заболувања.
Не треба да се спомене дека црниот дроб е еден од органите кои ја работат најтешката работа во телото, па затоа потребни му се тие осум часа одмор додека ние спиеме. Кога станува збор за постојан недостаток на сон, процесот на елиминација на токсините е попречен и црниот дроб се оштетува. Затоа, обидете се да спиете најмалку 8 часа за да му дозволите на црниот дроб да се одмори и да работи непречено во текот на денот.
Недостаток на физичка активност
Кингсли истакнува дека седечкиот начин на живот е исклучително опасен за вашето здравје поради многу причини, а една од нив е тоа што е главен фактор на ризик за развој на заболувања на црниот дроб. Недостатокот на активност може да доведе до воспаление, фиброза и замастен црн дроб.
Важно е да најдете рамнотежа и да посветите внимание на тоа колку време поминувате седејќи и да вклучите активности во секојдневниот живот. Тоа ќе му овозможи на црниот дроб да ја врши својата работа непрекинато и да остане здрав.
Претерано уживате во алкохолот
За штетните ефекти што алкохолот може да ги има врз нашето тело, особено кога станува збор за црниот дроб, не треба многу зборување. Но, некои луѓе сè уште се изненадени од фактот дека не мора да значи дека само прекумерното консумирање алкохол може да предизвика сериозна штета.
Ако сте здраво возрасно лице, консумирањето алкохол повремено во мали количини е прифатливо однесување, но ако имате семејна историја на алкохолизам или заболување на црниот дроб поврзано со алкохол, ограничете го консумирањето алкохол на минимум или, уште подобро, не пијте алкохол воопшто.
Постојан стрес
Прекумерната и долготрајна изложеност на стрес лошо влијае на целото тело, вклучително и на црниот дроб. Според резултатите на едно истражување на Универзитетот во Единбург постои поврзаност помеѓу високите нивоа на психолошки стрес (симптоми на анксиозност и депресија) и смртните случаи поврзани со разни заболувања на црниот дроб.
Иако овие резултати бараат и понатамошна научна потврда, многумина во медицинската заедница признаваат дека постои поврзаност помеѓу умот и телото. Традиционалната кинеска медицина со илјадници години проповеда дека повеќето органи се поврзани со емоциите. „Повеќето луѓе не сфаќаат дека црниот дроб е поврзан со гневот, гневот го блокира протокот на енергија на црниот дроб“, велат лекарите.
